वसईतील डॉक्टर तरुणीला मॅट्रिमोनियल साईटवर ‘इंजिनियर’ असल्याचे भासवून फसवणार्या सुभाष सातपुतेला वालीव पोलिसांनी अटक केली. लग्नाचे आमिष दाखवून ‘प्लेबॉय’शी संबंध ठेवण्यास सांगितल्याचा धक्कादायक प्रकार….
वसई: लग्नासाठी मॅट्रिमोनियल साईटवर स्थळ शोधणाऱ्या ३० वर्षीय डॉक्टर तरुणीला ‘३७ लाखांचा आयटी इंजिनियर’ असल्याचे भासवून फसवणूक करणाऱ्या एका भामट्याला वालीव पोलिसांनी अटक केली आहे. आरोपीने ‘कुमार जाधव’ या नावाने बनावट प्रोफाइल तयार करून केवळ फसवणूक केली नाही, तर लग्नापूर्वी ‘शारीरिक सुसंगतता’ तपासण्याच्या नावाखाली तरुणीला दुसऱ्याच व्यक्तीशी शारीरिक संबंध ठेवण्यास भाग पाडले. अखेर ‘प्लेबॉय’ आणि ‘इंजिनियर’ ही एकच व्यक्ती असल्याचा धक्कादायक खुलासा झाला आहे. याप्रकरणी सुभाष सातपुते (वय ३४, रा. नालासोपारा) याला पोलिसांनी बेड्या ठोकल्या आहेत.
नेमकं काय घडलं?
पोलिसांनी दिलेल्या माहितीनुसार, वसई परिसरात राहणारी ३० वर्षीय महिला डॉक्टर लग्नासाठी स्थळ शोधत होती. तिने एका नामांकित मॅट्रिमोनियल वेबसाईटवर आपले प्रोफाइल तयार केले होते. तिथे तिला ‘कुमार जाधव’ नावाचे प्रोफाइल आढळले. आरोपी सुभाष सातपुते याने जून २०२६ मध्ये या वेबसाईटवर ‘कुमार जाधव’ या नावाने बनावट प्रोफाइल तयार केले होते. यामध्ये स्वतःला मुंबईतील आयटी इंजिनियर असल्याचे तसेच वार्षिक उत्पन्न ३७ लाख रुपये असल्याचे नमूद केले होते.
या प्रोफाइलवरून दोघांमध्ये चॅटिंगद्वारे संवाद सुरू झाला. काही काळ बोलणं झाल्यानंतर आरोपीने तरुणीला लग्नाची मागणी घातली आणि तिनेही होकार दिला. मात्र, तो कधीही तिला प्रत्यक्ष भेटायला तयार होत नव्हता. तरुणीने लग्नाबाबत आणि भेटीबाबत तगादा लावल्यावर आरोपीने एक अत्यंत विचित्र अट समोर ठेवली.
‘प्लेबॉय’शी संबंध ठेवण्याची अट
आरोपीने तरुणीला सांगितले की, “लग्नाआधी मला तुझी लैंगिक क्षमता आणि आपली कम्पॅटिबिलिटी तपासायची आहे. पण यासाठी आपण भेटायची गरज नाही. तू दुसऱ्या पुरुषासोबत (प्लेबॉय) संबंध ठेव, त्याचा व्हिडिओ रेकॉर्ड करून मला पाठव, मगच मी लग्नाचा निर्णय घेईन.” इतकेच नव्हे तर, आरोपीने त्या डॉक्टर तरुणीला एका ‘प्लेबॉय’चा मोबाईल नंबरही दिला.
पोलिसांनी दिलेल्या माहितीनुसार, तरुणी त्या ‘प्लेबॉय’ला भेटली आणि त्यांच्यात हॉटेलमध्ये शारीरिक संबंध आले. तरुणीने आरोपीच्या सांगण्यावरून त्या शारीरिक संबंधांचा व्हिडिओ रेकॉर्ड करून ‘कुमार जाधव’ला पाठवला.
लग्नाला नकार आणि धक्कादायक खुलासा
व्हिडिओ पाठवल्यानंतर लग्नाला होकार मिळेल अशी तिला अपेक्षा होती. मात्र, आरोपीने अचानक ज्योतिषाचे कारण पुढे करत लग्नाला थेट नकार दिला. “ज्योतिषाने आपली पत्रिका पाहून सांगितले आहे की, तुझ्याशी लग्न झाल्यास ३ महिन्यांत माझा मृत्यू होईल,” असा बनाव त्याने केला.
अचानक ज्योतिषाचा विषय काढून लग्नाला नकार दिल्याने डॉक्टर तरुणीला संशय आला. तिने ‘कुमार जाधव’चा चॅटिंग पॅटर्न, दिलेले फोटो आणि ‘प्लेबॉय’ म्हणून मिळालेल्या नंबरची स्वतःहून शोधमोहीम सुरू केली. तपासादरम्यान तिच्या हाती काही पुरावे लागले आणि तिला धक्कादायक सत्य समजले. ज्या तरुणाला ती ‘प्लेबॉय’ म्हणून भेटली होती आणि जो तरुण तिच्याशी ‘कुमार जाधव’ बनून मॅट्रिमोनियल साईटवर बोलत होता, तो एकच व्यक्ती होता! सुभाष सातपुते यानेच ‘कुमार जाधव’ नावाने फेक प्रोफाइल तयार केले होते. त्यानेच लग्नाचे आमिष दाखवून ‘प्लेबॉय’च्या नावाखाली स्वतःचाच नंबर दिला आणि ‘प्लेबॉय’ बनून स्वतःच त्या तरुणीशी शरीरसंबंध ठेवले होते.
वालीव पोलिसांची धडक कारवाई
आपली फसवणूक झाल्याचे लक्षात येताच पीडित डॉक्टर तरुणीने तात्काळ वालीव पोलीस ठाण्यात धाव घेऊन तक्रार दाखल केली. पोलिसांनी तांत्रिक तपासाच्या आधारे आरोपीचे लोकेशन ट्रेस केले असता, तो नालासोपाऱ्याच्या संतोष भुवनजवळील झोपडपट्टीत राहत असल्याचे निष्पन्न झाले. पोलिसांनी तत्परतेने पावले उचलत १४ सप्टेंबर २०२६ रोजी आरोपी सुभाष सातपुतेला त्याच्या राहत्या घरातून अटक केली.
पीडितेच्या तक्रारीवरून आरोपीवर भारतीय न्याय संहिता (BNS) अंतर्गत बलात्कार आणि फसवणूक तसेच माहिती तंत्रज्ञान कायद्यानुसार (IT Act) विविध कलमांखाली गुन्हा दाखल करण्यात आला आहे. पोलिसांच्या प्राथमिक तपासात आरोपीने इन्स्टाग्रामवर अनेक बनावट (Fake) अकाऊंट्स उघडल्याचे समोर आले आहे. त्याने यापूर्वी अशाच प्रकारे आणखी किती तरुणींना आपल्या जाळ्यात ओढले आहे का, याचा कसून तपास आता वालीव पोलीस करत आहेत.
पुढे काय?
पोलीस सध्या आरोपीचे मोबाईल फोन, ऑनलाइन मॅट्रिमोनियल प्रोफाइल, पीडितेशी झालेली बातचीत आणि इतर डिजिटल पुरावे तपासत आहेत. आरोपीचे बनावट इन्स्टाग्राम अकाऊंट्स आणि इतर डिजिटल पुरावे तपासाचा भाग असल्याचे अधिकाऱ्यांनी सांगितले. या प्रकरणात आणखी कोणाचा सहभाग आहे का, याचाही पोलीस शोध घेत आहेत.
By
