पिंपरी-चिंचवडमधील ग्लोबल मराठा बिझनेस एक्स्पोमध्ये आयएएस अधिकारी तुकाराम मुंढे यांनी तरुण पिढीला चारित्र्य निर्माण करण्याचा आणि सातत्य ठेवण्याचा मंत्र दिला.
पिंपरी-चिंचवड: आजच्या डिजिटल युगात तरुणाईचे आयुष्य ७ सेकंदांच्या रील्स आणि स्क्रोलिंगमध्ये अडकले असताना, आयएएस अधिकारी तुकाराम मुंढे (Tukaram Mundhe) यांनी तरुण पिढीला अत्यंत महत्त्वाचा आणि तिखट सल्ला दिला आहे. पिंपरी-चिंचवड येथील ‘ग्लोबल मराठा बिझनेस एक्स्पो २०२६’ मध्ये बोलताना मुंढे यांनी तरुणाईच्या बदलत्या मानसिकतेवर सडेतोड प्रहार केला.
या कार्यक्रमात बोलताना तुकाराम मुंढे म्हणाले की, “मी माझ्या मुलांना आयएएस होऊ नका, असा सल्ला देईन.” हे उत्तर ऐकून अनेकांना धक्का बसला. तसेच, जर कोणी विचारले की आयएएस अधिकारी व्हावे की यशस्वी उद्योजक, तर त्यांचे उत्तर होते, “पब्लिक लीडर व्हा”.
तरुणाईची ताकद आणि मर्यादा
मुंढे यांनी स्पष्टपणे सांगितले की, आजची तरुण पिढी अत्यंत ज्ञानी आणि ऊर्जावान आहे. त्यांच्याकडे माहितीचा साठा एका क्लिकवर उपलब्ध आहे आणि ते खूप वेगवान आहेत. मात्र, त्यांची सर्वात मोठी मर्यादा म्हणजे त्यांचा ‘अटेंशन स्पॅन’ (एकाग्रतेचा काळ) अत्यंत कमी आहे. मोबाईलवर स्क्रीन स्क्रोल करताना तरुणाई एका जागी ७ सेकंदांपेक्षा जास्त वेळ थांबत नाही. त्यांना थांबायला सांगितलं तरी त्रास होतो. मात्र, प्रत्येक प्रश्नाचे उत्तर ७ सेकंदात मिळत नाही. आजच्या कठीण समस्यांचे उत्तर मिळवण्यासाठी चिकाटी आणि सातत्याची गरज असते, असे ते म्हणाले.
यशाचा खरा मंत्र: ‘कॅरेक्टर बिल्डिंग’
तुकाराम मुंढे यांनी तरुणाईला यशाचा सर्वात प्रभावी मंत्र दिला, तो म्हणजे ‘कॅरेक्टर बिल्डिंग’ (चारित्र्य निर्माण करणे). ते म्हणाले की, जोपर्यंत तुमचं चारित्र्य घडत नाही, तोपर्यंत तुम्ही आयुष्यात कायमस्वरूपी यशस्वी होऊ शकत नाही. आयुष्यात यश आणि अपयश दोन्ही येणारच आहेत, पण अशा प्रत्येक कठीण प्रसंगी योग्य मार्ग दाखवण्याचं काम तुमचं चारित्र्य करतं. त्यामुळे चारित्र्य निर्माण करणे ही आपल्या सर्वांची जबाबदारी आहे. “बी द पीपल ऑफ कॅरेक्टर अँड फोर्टिट्युड” (चारित्र्यसंपन्न आणि धैर्यवान व्यक्ती व्हा), असा संदेश त्यांनी तरुणाईला दिला.
तंत्रज्ञानाचा वापर विवेकाने करा
आजच्या एआय आणि मशीन लर्निंगच्या युगात केवळ माहिती किंवा बुद्धिमत्ता असणे पुरेसे नाही, तर योग्य-अयोग्य समजण्याचा ‘विवेक’ असणे आवश्यक आहे. सोशल मीडियावर सतत दिसणाऱ्या गोष्टी पाहत राहण्यापेक्षा त्यावर विचार करा, स्वतःची ओळख निर्माण करा आणि मेहनतीची तयारी ठेवा, असे आवाहनही त्यांनी यावेळी केले.
तुकाराम मुंढे यांचा हा सल्ला आजच्या तरुणाईसाठी अत्यंत महत्त्वाचा आहे. ७ सेकंदांच्या आभासी जगातून बाहेर पडून, खऱ्या आयुष्यातील समस्यांना सामोरे जाण्यासाठी आणि चारित्र्यसंपन्न नागरिक घडवण्यासाठी हा सल्ला दिशादर्शक ठरेल.
आयएएस अधिकारी तुकाराम मुंढे यांनी पिंपरी-चिंचवडमधील कार्यक्रमात तरुणाईला मोलाचा सल्ला दिला.
By
