राज्याच्या पुण्यश्लोक अहिल्यादेवी होळकर शेतकरी कर्जमुक्ती योजनेअंतर्गत १६ लाख ९६ हजार शेतकऱ्यांच्या खात्यात ७ हजार कोटी रुपये जमा होत आहेत. आयकरदाते शेतकरी मात्र योजनेतून वगळण्यात आले आहेत. जाणून घ्या संपूर्ण अपडेट.
मराठवाडा अपडेट 24 : राज्यातील लाखो शेतकऱ्यांसाठी आजपासून आनंदाची बातमी समोर आली आहे. ‘पुण्यश्लोक अहिल्यादेवी होळकर शेतकरी कर्जमुक्ती योजना २०२६’ अंतर्गत कर्जमाफीची रक्कम थेट बँक खात्यात जमा होण्यास सुरुवात झाली आहे. या योजनेत १६ लाख ९६ हजार शेतकऱ्यांना मोठा दिलासा मिळणार आहे. मात्र, याचबरोबर ९४ हजार आयकरदात्या शेतकऱ्यांना या योजनेतून वगळण्यात आल्याने त्यांच्यासमोर निराशेचे वादळ आले आहे.
७ हजार कोटी रुपयांचा डीबीटी लाभ सुरू
राज्य सरकारने आजपासून डीबीटी (प्रत्यक्ष लाभ हस्तांतरण) प्रणालीद्वारे ७,००० कोटी रुपये पात्र शेतकऱ्यांच्या खात्यात जमा करण्यास सुरुवात केली आहे. या एकाच टप्प्यात १६ लाख ९६ हजार शेतकऱ्यांना कर्जमाफीचा लाभ मिळणार आहे. या योजनेअंतर्गत दोन लाख रुपयांपर्यंतचे थकीत पीक कर्ज माफ करण्यात येत आहे.
या पहिल्या टप्प्यात ७.०३ लाख शेतकरी जिल्हा मध्यवर्ती सहकारी बँकांचे तर ९.९३ लाख शेतकरी व्यापारी व राष्ट्रीयीकृत बँकांचे आहेत. एकूण १३,३३६ कोटी रुपयांच्या कर्जमुक्तीचा समावेश या यादीत आहे.
९४ हजार शेतकरी का अपात्र?
या योजनेतून सर्वाधिक चर्चा आहे ती ९४ हजार शेतकऱ्यांना वगळण्याची. सरकारने कर्जमुक्ती योजनेतून आयकरदाते शेतकरी अपात्र ठरवले आहेत. या निर्णयामुळे हे शेतकरी कर्जमाफीच्या यादीतून वगळण्यात आले आहेत.
याशिवाय एकवेळ समझोता (ओटीएस) अंतर्गत कर्जफेड करणाऱ्या ६ लाख २५ हजार शेतकऱ्यांच्या खात्यातही कर्जमाफीची रक्कम जमा होणार आहे.
एनपीए शेतकऱ्यांना मोठा दिलासा
नापिकी, पावसाचे दुष्चक्र आणि इतर कारणांमुळे पीक कर्ज परतफेड करू न शकलेल्या अनेक शेतकऱ्यांची कर्जखाती बुडीत (एनपीए) गृहीत धरण्यात आली होती. या शेतकऱ्यांना नवीन पीक कर्ज मिळणे कठीण झाले होते.
राज्य सरकारने मात्र एनपीए शेतकऱ्यांनाही मोठा दिलासा दिला आहे. सर्व बँकांसाठी व्याज सवलत योजना जाहीर करण्यात आली असून, कुलिंग पिरियड न ठेवता लगेच पुन्हा कर्ज देण्यास बँकांनी मान्यता दिली आहे. यामुळे बुडीत कर्जखाती असलेल्या शेतकऱ्यांना पुन्हा शेतीसाठी कर्ज उपलब्ध होण्याचा मार्ग मोकळा झाला आहे.
४०,९८० कोटी रुपयांची कर्जमाफी
राज्य सरकारची ही कर्जमाफी योजना अनेक टप्प्यांत राबविण्यात येत आहे. कृषिमंत्री दत्तात्रय भरणे यांनी कर्जमाफी योजना तीन टप्प्यात पार पडणार असल्याचे स्पष्ट केले आहे. ऑगस्टच्या अखेरपर्यंत ही प्रक्रिया सुरू राहण्याची शक्यता आहे.
या योजनेअंतर्गत एकूण ४०,९८० कोटी रुपयांची कर्जमाफी करण्यात येणार आहे. यापैकी अगोदरचे ३६,५८५ कोटी रुपये तर महात्मा फुले कर्जमाफी योजनेतील १२ लाख लाभार्थी शेतकऱ्यांसाठी अतिरिक्त ४,३९५ कोटी रुपयांची तरतूद करण्यात आली आहे.
राज्यातील एकूण ५६ लाख पात्र शेतकऱ्यांना या योजनेचा फायदा होणार आहे. तसेच नियमित कर्ज फेडणाऱ्या २३.६३ लाख शेतकऱ्यांना ५० हजार रुपयांपर्यंत प्रोत्साहनपर लाभ मिळणार आहे.
शेतकऱ्यांनी काय करावे?
कर्जमाफीचा लाभ मिळवण्यासाठी पात्र शेतकऱ्यांनी ॲग्रीस्टॅक (Agristack) वर नोंदणी करून आधार प्रमाणीकरण (Aadhaar Authentication) प्रक्रिया पूर्ण करणे आवश्यक आहे. सरकारने डिजिटल पडताळणीवर भर दिल्याने पात्र शेतकऱ्यांना वेळेवर लाभ मिळू शकेल, अशी अपेक्षा आहे.
महत्त्वाचे: कर्जमाफीच्या यादीत आपले नाव आहे का, हे तपासण्यासाठी शेतकऱ्यांनी सहकार विभागाच्या अधिकृत पोर्टलला भेट द्यावी.
By
