इन्स्टाग्रामवरील जुन्या नोटांच्या बदल्यात 51 लाख मिळण्याच्या आमिषाने वरळीतील व्यक्तीकडून 3 लाख 3 हजार रुपयांची फसवणूक. वरळी पोलिसांत गुन्हा दाखल.
सोशल मीडियावरील आकर्षक रील्स आणि प्रचंड नफ्याची आमिषं यामागे अनेकदा सायबर ठगांचा डाव असतो. मुंबईत असाच एक धक्कादायक प्रकार उघडकीस आला आहे, जिथे 5 रुपयांच्या जुन्या नोटांच्या बदल्यात तब्बल 51 लाख रुपये मिळण्याचं स्वप्न दाखवून एका व्यक्तीकडून लाखो रुपयांची फसवणूक करण्यात आली. इन्स्टाग्रामवर दिसलेल्या एका रीलने सुरू झालेला हा खेळ पीडितेसाठी महागात पडला.
इन्स्टाग्राम रीलने दाखवलं स्वप्न, व्हॉट्सॲपवरून झाला संपर्क
वरळी परिसरात राहणाऱ्या एका व्यक्तीने इन्स्टाग्रामवर एक रील पाहिली होती. या रीलमध्ये असा दावा करण्यात आला होता की, 5 रुपयांच्या जुन्या नोटांना बाजारात प्रचंड मागणी आहे आणि त्यांच्या बदल्यात मोठी रक्कम मिळू शकते. विशेष क्रमांक असलेल्या किंवा जुन्या नोटांना लाखो रुपयांची किंमत मिळू शकते, असं त्या जाहिरातीत सांगण्यात आलं होतं.
या आकर्षक दाव्याने प्रभावित होऊन पीडित इसमाने रीलमध्ये दिलेल्या व्हॉट्सॲप क्रमांकावर संपर्क साधला. त्यानंतर आरोपींनी त्याला त्याच्याकडे असलेल्या 5 रुपयांच्या जुन्या नोटांचे फोटो पाठवण्यास सांगितलं.
51 लाखांचं आमिष आणि सुरू झाली फीची मागणी
पीडित इसमाने 5 रुपयांच्या पाच जुन्या नोटांचे फोटो आरोपींना पाठवले. त्यानंतर आरोपींनी या नोटांच्या बदल्यात त्याला 51 लाख रुपये मिळू शकतात, असं आमिष दाखवलं. विश्वास संपादन करण्यासाठी सुरुवातीला आरोपींनी एक क्यूआर कोड पाठवला आणि प्रोसेसिंग शुल्काच्या नावाखाली 11 हजार रुपये जमा करण्यास सांगितलं.
ही रक्कम जमा झाल्यानंतर आरोपींनी विविध औपचारिकता आणि शुल्क यांचं कारण देत वारंवार पीडितेकडे पैशांची मागणी सुरू ठेवली. मोठ्या नफ्याचं आमिष दाखवून आरोपींनी अनेक टप्प्यांत पैसे उकळले.
4 ते 12 जून दरम्यान वेगवेगळ्या खात्यांमध्ये ट्रान्सफर केले पैसे
पोलिसांनी दिलेल्या माहितीनुसार, 4 जून ते 12 जून 2026 या कालावधीत आरोपींनी पीडितेला वेगवेगळ्या बँक खात्यांमध्ये रक्कम ट्रान्सफर करण्यास सांगितली. या काळात पीडित इसमाने एकूण 3 लाख 3 हजार 231 रुपये जमा केले.
मात्र, वारंवार पैसे भरूनही दावा करण्यात आलेले 51 लाख रुपये त्याला मिळाले नाहीत. अखेर आपली फसवणूक झाल्याचं त्याच्या लक्षात आलं आणि तो हादरला.
वरळी पोलिसांत गुन्हा दाखल, तपास सुरू
पीडित इसमाने वरळी पोलीस ठाण्यात धाव घेत सर्व प्रकार सांगितला. त्याच्या तक्रारीच्या आधारे पोलिसांनी अज्ञात आरोपींविरुद्ध गुन्हा दाखल केला आहे. IT Act कलम 66(C), 66(D) तसेच BNS कलम 318(4), 319(2) अंतर्गत गुन्हा दाखल करण्यात आला असून पोलिसांनी तपास सुरू केला आहे.
आरोपींनी फसवणुकीसाठी वापरलेली बँक खाती आणि मोबाईल क्रमांक यांची माहिती तपास यंत्रणा गोळा करत आहे. या प्रकरणात अधिक तपास सुरू असल्याचं पोलिसांनी सांगितलं.
पोलिसांचं आवाहन – जुन्या नोटा-नाण्यांच्या दाव्यांना बळी पडू नका
फेसबुक, इन्स्टाग्राम आणि इतर सोशल मीडिया प्लॅटफॉर्मवर जुन्या नोटा आणि नाण्यांच्या बदल्यात लाखो-कोट्यवधी रुपये मिळतील, असे जे दावे केले जातात ते बनावट असतात, असं पोलिसांनी स्पष्ट केलं आहे.
सायबर ठग अशा जाहिरातींच्या माध्यमातून लोकांना पैशांच्या आमिषाने जाळ्यात ओढतात आणि त्यानंतर प्रोसेसिंग फी, जीएसटी, रजिस्ट्रेशन शुल्क किंवा इतर कारणे सांगून पैसे उकळतात. त्यामुळे नागरिकांनी सावध राहावं, कोणत्याही आमिषाला बळी पडू नये, असं आवाहन पोलिसांनी केलं आहे.
By
