पुणे आणि भिवंडीतील टोबॅको कंपन्यांवर कार्यक्षेत्राबाहेर धाड टाकल्याच्या प्रकरणात एफडीएच्या एकूण 26 अधिकाऱ्यांवर कारवाईची टांगती तलवार असून, सहा जणांवर यापूर्वीच निलंबनाची कारवाई झाली आहे.
मुंबई : पुणे आणि भिवंडी येथील टोबॅकोशी संबंधित कंपन्यांवर कार्यक्षेत्राबाहेर जाऊन धाडी टाकल्याचं प्रकरण अन्न व औषध प्रशासन विभागासाठी (FDA) चांगलंच भोवणार असल्याचं दिसून येत आहे. या प्रकरणात एफडीएच्या आणखी सहा अधिकाऱ्यांचं निलंबन होण्याची शक्यता असून, या कारवाईला मुख्यमंत्र्यांनी तत्त्वतः हिरवा कंदील दाखवल्याचं सूत्रांच्या हवाल्याने समोर आलं आहे. एकूण 26 अधिकाऱ्यांवर या प्रकरणात ठपका ठेवण्यात आला असून, त्यापैकी सहा जणांवर यापूर्वीच निलंबनाची कारवाई झाली आहे.
अधिकारक्षेत्राबाहेर जाऊन कारवाई केल्याचा आरोप
मिळालेल्या माहितीनुसार, एफडीएच्या अधिकाऱ्यांनी पुणे आणि भिवंडी येथील तंबाखू किंवा टोबॅकोशी संबंधित कंपन्यांवर धाडी टाकल्या होत्या. मात्र, या कंपन्या केंद्र सरकारच्या अखत्यारीत येत असल्याचा दावा केला जात आहे. राज्याच्या एफडीए अधिकाऱ्यांनी आपल्या अधिकारक्षेत्राबाहेर जाऊन कारवाई केल्याचा आरोप या अधिकाऱ्यांवर करण्यात आला आहे. या कारवाईच्या अधिकारांवरून वाद निर्माण झाला असून, प्रकरण न्यायालयापर्यंत पोहोचल्याचंही सांगितलं जात आहे.
आयुक्त मुंडे आणि मंत्री झिरवळ यांची भूमिका
या संपूर्ण प्रकरणात एफडीए आयुक्त तुकाराम मुंडे आणि संबंधित मंत्री नरहरी झिरवळ यांनी गंभीर दखल घेतली आहे. दोघांनीही या प्रकरणाची फाईल मुख्यमंत्र्यांकडे पाठवली होती. त्यानंतर मुख्यमंत्र्यांनी आणखी सहा अधिकाऱ्यांच्या निलंबनाला हिरवा कंदील दाखवल्याची माहिती समोर आली आहे. उर्वरित 20 अधिकाऱ्यांची विभागीय चौकशी करून त्यांच्यावर कारवाईचे आदेश देण्यात आल्याचंही सूत्रांकडून कळतं.
पुढे काय?
सध्या ही माहिती सूत्रांच्या हवाल्याने समोर आलेली असून, निलंबन आणि विभागीय चौकशीबाबतचे अधिकृत आदेश अद्याप जाहीर झालेले नाहीत. त्यामुळे या प्रकरणात नेमकी काय कारवाई होते, याकडे राज्यभरातील एफडीए विभागाच्या अधिकाऱ्यांचं लक्ष लागलं आहे.
By
