महाराष्ट्र FDA ने डॉमिनोज पिझ्झाच्या मुंबई व सातारा येथील 4 आउटलेटचे परवाने अन्नसुरक्षा व स्वच्छतेच्या उल्लंघनासाठी रद्द केले. तुकाराम मुंढे यांच्या नेतृत्वात 104 आस्थापनांवर छापे.
महाराष्ट्रात अन्नसुरक्षेची मोहीम; डॉमिनोज पिझ्झाच्या चार आउटलेटवर कारवाई
राज्यातील अन्न व औषध प्रशासनाने (FDA) अलीकडच्या काळात भेसळखोर व अस्वच्छ हॉटेल्सविरोधात मोठी मोहीम हाती घेतली आहे. याचाच एक भाग म्हणून आज (बुधवारी) एफडीए आयुक्त तुकाराम मुंढे यांच्या नेतृत्वाखाली जगप्रसिद्ध पिझ्झा साखळी डॉमिनोजवर कडक कारवाई करण्यात आली. राज्यातील डॉमिनोजच्या एकूण चार आउटलेटचे अन्न व्यवसाय परवाने (Food Business Licenses) निलंबित करण्यात आले आहेत. यामध्ये मुंबईतील तीन आणि सातारा जिल्ह्यातील एका आउटलेटचा समावेश आहे.
तुकाराम मुंढे यांची धडक कारवाई; मुंबईतील तीन आऊटलेट सील
एफडीए आयुक्त तुकाराम मुंढे यांनी राज्यभरातील साखळी रेस्टॉरंट्सवर विशेष मोहीम राबवली. या मोहिमेंतर्गत ११ ऑगस्ट रोजी मुंबई, सातारा, नाशिकसह विविध ठिकाणी एकूण १०४ खाद्य आस्थापनांवर अचानक छापे टाकण्यात आले. या छाप्यांमध्ये डॉमिनोज पिझ्झाच्या ज्या आउटलेटवर कारवाई करण्यात आली, ती आउटलेट ज्युबिलंट फूडवर्क्स लिमिटेड (Jubilant FoodWorks Ltd.) च्या मालकीची असल्याची माहिती समोर आली आहे.
मुंबईतील ज्या तीन आउटलेटचे परवाने निलंबित करण्यात आले, त्यांची नावे खालीलप्रमाणे आहेत:
- विले पार्ले (पश्चिम)
- बोरिवली (पश्चिम)
- आर-सिटी मॉल, घाटकोपर (पश्चिम)
तर चौथा आउटलेट सातारा जिल्ह्यातील कराड तालुक्यातील माळकापूर येथे आहे.
कोणत्या त्रुटी आढळल्या? वेगवेगळ्या आउटलेटमध्ये वेगवेगळ्या समस्या
एफडीएने केलेल्या तपासणीत या चारही आउटलेटमध्ये अन्नसुरक्षा व स्वच्छतेचे गंभीर नियम मोडले गेल्याचे आढळून आले.
- विले पार्ले आउटलेट: येथे एफएसएसएआय (FSSAI) परवाना प्रदर्शन, पिण्याच्या पाण्याची गुणवत्ता, अन्न साठवणूक, कीटकनियंत्रण व स्वच्छता सुविधांमध्ये कमतरता आढळली. गोठवलेल्या पदार्थांचे तापमान नियंत्रण, अन्न व अ-अन्न वस्तूंची विभागणी, उंदीर व कीटक प्रतिबंध तसेच हात धुण्याच्या सोयी सुधारण्याचे निर्देश देण्यात आले.
- बोरिवली आउटलेट: येथे १५ टक्के अनुपालन नसल्याचे (non-compliance) आढळले. अन्न साठवणूक, तापमान नियंत्रण, अन्न चाचणी, स्वच्छता व कीटकनियंत्रण या बाबींमध्ये सुधारणा आवश्यक असल्याचे सांगण्यात आले. तसेच कच्चे व शिजवलेले अन्न, शाकाहारी व मांसाहारी पदार्थांची योग्य विभागणी करण्याचे आदेश देण्यात आले.
- घाटकोपर (आर-सिटी मॉल) आउटलेट: येथे स्वच्छता, सॅनिटायझेशन वेळापत्रक व कीटकनियंत्रणात कमतरता आढळली. तसेच फिफो (First In, First Out) आणि फेफो (First Expired, First Out) या पद्धतींचे पालन केले जात नव्हते. अन्न-ग्रेड प्रमाणपत्रे व देखभाल नोंदींचा अभावही आढळून आला.
- माळकापूर (सातारा) आउटलेट: येथे सर्वाधिक म्हणजे सुमारे ४० टक्के अनुपालन नसल्याचे आढळले. मूलभूत सुविधा, उपकरणे, स्वच्छता व कीटकनियंत्रणात मोठ्या प्रमाणात कमतरता होत्या
एफडीएची राज्यव्यापी मोहीम; १०४ आस्थापनांवर छापे
ही कारवाई ही केवळ डॉमिनोजपुरती मर्यादित नसून, एफडीएने राज्यभरातील साखळी रेस्टॉरंट्सवर मोठी मोहीम हाती घेतली आहे. या मोहिमेंतर्गत डॉमिनोज, केएफसी, पिझ्झा हट, मॅकडोनाल्ड्स, सबवे, बर्गर किंग, स्टारबक्स आणि मोंगिनीससह एकूण १०४ आस्थापनांची तपासणी करण्यात आली.
या तपासणीदरम्यान दोन आस्थापनांना तात्काळ बंद करण्याचे आदेश देण्यात आले, तर ९५ आस्थापनांना सुधारणा सूचना (improvement notices) देण्यात आल्या. एकूण पाच अन्न व्यवसाय परवाने तात्काळ प्रभावाने निलंबित करण्यात आले.
नाशिक जिल्ह्यातील पाच खाद्य आस्थापनांचे परवानेही निलंबित करण्यात आले. तसेच मुंबईतील मुलुंड व भांडुप येथील दोन ढाब्यांवरही कारवाई करण्यात आली.
अन्नसुरक्षेबाबत एफडीएची सक्त भूमिका
एफडीए आयुक्त तुकाराम मुंढे यांनी अन्नसुरक्षा नियमांचे उल्लंघन करणाऱ्या कोणत्याही आस्थापनाविरुद्ध कठोर कारवाई केली जाईल, असे स्पष्ट केले आहे. गेल्या काही महिन्यांत एफडीएने ३,००० हून अधिक हॉटेल्स, रेस्टॉरंट्स आणि खाद्य आस्थापनांची तपासणी केली असून, १६५ परवाने निलंबित केले आहेत.
डॉमिनोजच्या या चार आउटलेटचे परवाने सध्या निलंबित असून, संबंधित आस्थापनांना अन्नसुरक्षा व स्वच्छतेच्या सर्व नियमांचे पालन केल्यानंतरच परवाने पुन्हा सुरू करण्याची परवानगी दिली जाईल, असे एफडीएकडून स्पष्ट करण्यात आले आहे.
By
