छत्रपती संभाजीनगरमध्ये सायबर ठगांनी WhatsApp DP वर कंपनी संचालकांच्या मुलीचा फोटो लावून अकाउंटंटकडून दीड तासात 3 कोटी 70 लाख रुपये ट्रान्सफर करून घेतले. जवाहरनगर पोलिस ठाण्यात गुन्हा दाखल, तपास सुरू.

व्हॉट्सॲप DP वर मालकाच्या मुलीचा फोटो; अकाउंटंटकडून दीड तासात 3 कोटी 70 लाख उकळले

छत्रपती संभाजीनगर: शहरातील गारखेडा परिसरातील एका मोठ्या इन्फ्रा कंपनीवर सायबर ठगांनी अत्यंत शिताफीने हल्ला चढवला. कंपनीच्या संचालकांच्या मुलीचा फोटो व्हॉट्सॲपच्या डिस्प्ले पिक्चरवर (DP) लावून ठगांनी कंपनीच्या अकाउंटंटला जाळ्यात ओढले आणि अवघ्या दीड तासाच्या कालावधीत तब्बल 3 कोटी 70 लाख रुपये दोन वेगवेगळ्या बँक खात्यांमध्ये ट्रान्सफर करून घेतले. याप्रकरणी जवाहरनगर पोलिस ठाण्यात सायबर गुन्हा दाखल करण्यात आला आहे.

नेमकं काय घडलं?

घटनेची सुरुवात 14 सप्टेंबर 2026 रोजी सकाळी 10.09 वाजता झाली. 42 वर्षीय अकाउंटंटला एका अनोळखी क्रमांकावरून व्हॉट्सॲपवर मेसेज आला. त्या क्रमांकाच्या DP वर कंपनीच्या संचालकांच्या मुलीचा फोटो होता. संबंधित व्यक्ती कंपनीच्या संचालकांच्या कुटुंबातीलच असल्याचा आभास निर्माण झाला आणि अकाउंटंटने त्या मेसेजवर विश्वास ठेवला.

संशयित आरोपींनी WhatsApp मिररिंग या तंत्रज्ञानाचा वापर केल्याचे प्राथमिक तपासात समोर आले आहे. या पद्धतीत ठग कंपनीच्या संचालकांच्या व्हॉट्सॲपमधील जुने चॅट वाचतात आणि त्यांच्या संभाषणाची शैली हुबेहूब आत्मसात करतात. त्यानंतर ते संचालकच संवाद साधत असल्याचा बनाव करतात.

बँक खात्यांची माहिती मागवली

आरोपींनी अकाउंटंटकडून कंपनीच्या विविध बँक खात्यांमधील शिल्लक रकमेचे स्क्रीनशॉट मागवले. वरिष्ठांकडूनच सूचना आल्याचे समजून अकाउंटंटने आवश्यक माहिती शेअर केली. त्यानंतर 15 सप्टेंबर रोजी सकाळी 9.21 वाजता आरोपींनी लखनौ येथील एका खात्यात 1 कोटी 70 लाख रुपये RTGS द्वारे पाठवण्याची सूचना दिली. त्यानंतर दुपारी 1.09 वाजता पटना येथील एका रुग्णालयाच्या नावावरील खात्यात 2 कोटी रुपये पाठवण्याचे आदेश दिले.

संचालकांना फोन केला, पण…

अकाउंटंटने पैसे ट्रान्सफर करण्यापूर्वी संचालकांना फोनद्वारे खात्री करण्याचा प्रयत्न केला, मात्र त्यांना प्रतिसाद मिळाला नाही. व्हॉट्सॲपवरील संभाषणावर विश्वास ठेवून त्याने दोन्ही ट्रान्सफर पूर्ण केले. दुपारी 3.37 वाजता संचालकांनी स्वतः फोन करून फसवणूक झाल्याचे उघड केले.

80 लाख रक्कम काढली

पोलिसांच्या माहितीनुसार, 15 सप्टेंबरच्या संध्याकाळपर्यंत सुमारे 80 लाख रुपये चेक आणि कार्डद्वारे काढण्यात आले होते. उर्वरित रक्कम तीन राज्यांतील 29 बँक खात्यांमधून वळवण्यात आली. सायबर पोलिसांनी बँक नोडल अधिकाऱ्यांशी आणि इंडियन सायबर क्राइम कोऑर्डिनेशन सेंटरशी (I4C) संपर्क साधला. त्याच दोन खात्यांशी संबंधित देशभरातील तीन अन्य सायबर तक्रारी आढळल्या असून, विविध खात्यांमधून 4.50 कोटी रुपये गोठवण्यात पोलिसांना यश आले आहे.

शहरातील सहावी घटना

ही घटना शहरातील उद्योजकांवरील सहावी समान प्रकरण आहे. यापूर्वीही अशाच पद्धतीने उद्योजकांना 1 कोटी, 50 लाख, 20 लाख, 9.8 लाख आणि 47 लाख रुपयांचा गंडा घालण्यात आला आहे. पोलीस आयुक्त प्रवीण पवार यांनी उद्योजकांना प्रत्येक तातडीच्या पेमेंटची विनंती थेट फोनवरून खात्री केल्यानंतरच स्वीकारण्याचे आवाहन केले आहे. तसेच कंपन्यांनी अकाउंटंट, कर्मचारी आणि कुटुंबीयांना CEO फसवणुकीबाबत सतर्क करण्याचे आणि मोठ्या व्यवहारांसाठी लिखित मंजुरी अनिवार्य करण्याचे निर्देश दिले आहेत.

जवाहरनगर पोलिसांकडून तपास सुरू

याप्रकरणी अकाउंटंटने दिलेल्या तक्रारीवरून जवाहरनगर पोलिस ठाण्यात सायबर गुन्हा दाखल करण्यात आला आहे. पोलिसांनी पैसे ज्या दोन बँक खात्यांमध्ये ट्रान्सफर झाले, त्यांची माहिती तपासण्यास सुरुवात केली आहे. तसेच बँकिंग ट्रेल, व्हॉट्सॲप चॅट, मोबाइल डिव्हाइस लॉग-इन डिटेल्स आणि अन्य डिजिटल पुरावे तपासले जात आहेत. संचालकांच्या मोबाइल किंवा व्हॉट्सॲप खात्यापर्यंत सायबर ठगांची पोहोच कशी झाली, याचाही शोध पोलिस घेत आहेत.