औरंगजेबाची कबर तोडण्याची धमकी देणाऱ्या फोनमुळे पोलीस यंत्रणेत खळबळ. खुलताबाद पोलिसांनी देवकुमार याच्यावर गुन्हा दाखल केला. वाचा सविस्तर बातमी.
मध्यरात्री पोलीस नियंत्रण कक्षाला धमकीचा फोन
छत्रपती संभाजीनगर : औरंगजेबाच्या कबरीला लक्ष्य करून दिलेल्या धमकीमुळे पोलीस प्रशासनाची झोप उडाली आहे. शहर पोलीस नियंत्रण कक्षाला मध्यरात्री साडे दोन वाजता एक अनोळखी फोन आला, ज्यामध्ये औरंगजेबाची कबर तोडण्याचा इशारा देण्यात आला. या घटनेनंतर पोलिसांनी तात्काळ कारवाई करत संशयिताविरुद्ध गुन्हा दाखल केला आहे.
गुरुवारी (३ सप्टेंबर) रात्री २.३३ वाजता शहर पोलीस नियंत्रण कक्षाच्या क्रमांकावर एका मोबाईलवरून कॉल आला. फोन करणाऱ्याने प्रथम ‘बजरंग दलाचे नंबर’ विचारले. पोलिसांनी ते उपलब्ध नसल्याचे सांगितल्यानंतर, त्याने थेट धमकी दिली की, “बजरंग दलाची परवानगी आहे असे समजून उद्या सकाळी औरंगजेबाची कबर तोडणार आहोत.”
पोलीस खबरदारी, गुन्हा दाखल
या धक्कादायक फोनमुळे पोलीस यंत्रणेत खळबळ उडाली. खुलताबाद पोलीस ठाण्यात पोलीस हेडकॉन्स्टेबल कारभारी गवळी यांनी फिर्याद दिली. त्यांच्या फिर्यादीवरून डी. देवकुमार नावाच्या व्यक्तीविरुद्ध गुन्हा दाखल करण्यात आला आहे. पोलिसांनी या प्रकरणी तपास सुरू केला असून, फोन करणाऱ्याचा शोध घेतला जात आहे. दरम्यान, औरंगजेबाच्या कबरीजवळ पोलीस बंदोबस्त वाढवण्यात आला आहे.
ऐतिहासिक वास्तू असलेल्या कबरीची सुरक्षा महत्त्वाची
छत्रपती संभाजीनगर जिल्ह्यातील खुलताबाद येथे औरंगजेबाची कबर आहे. ही ऐतिहासिक वास्तू असल्याने तिची सुरक्षा ही प्रशासनासमोर मोठे आव्हान आहे. धमकीचा फोन आल्यानंतर पोलिसांनी कबरीच्या सुरक्षेसाठी अतिरिक्त पोलीस बल तैनात केले आहे. स्थानिक प्रशासनाने नागरिकांना शांतता राखण्याचे आवाहन केले आहे. या प्रकारामुळे परिसरात तणावाचे वातावरण निर्माण झाले असले, तरी पोलिसांनी परिस्थिती नियंत्रणात असल्याचे स्पष्ट केले आहे.
By
