पालघर जिल्ह्यातील तलासरीत १९ वर्षीय तरुणीवर सहा जणांनी सामूहिक लैंगिक अत्याचार केल्याची धक्कादायक घटना. पोलिसांनी तीन आरोपींना अटक केली असून उर्वरितांचा शोध सुरू.
पालघरमधील सामूहिक बलात्काराच्या घटनेने खळबळ
राज्यात महिला आणि तरुणींवरील लैंगिक अत्याचारांच्या घटना दिवसेंदिवस वाढतच आहेत. सरकारकडून कठोर कारवाईचे आदेश देण्यात येत असले तरी प्रत्यक्षात घटनांमध्ये घट होताना दिसत नाही. अशातच पालघर जिल्ह्यातील तलासरी परिसरात एका १९ वर्षीय तरुणीवर सहा जणांनी सामूहिक लैंगिक अत्याचार केल्याची संतापजनक घटना समोर आली आहे. या घटनेमुळे संपूर्ण परिसर हादरला असून पोलिसांनी तीन आरोपींना अटक केली आहे.
तलासरी पोलीस ठाण्याच्या हद्दीत ही घटना घडली. पीडित तरुणीने दिलेल्या तक्रारीनुसार, ती आपल्या मित्रासोबत दुचाकीवरून फिरायला गेली होती. खामगाव येथे त्यांची दुचाकी स्लीप झाल्याने ते खाली पडले. याचाच फायदा घेत मागून आलेल्या तीन जणांनी तरुणीच्या मित्राला धमकावून हाकलून लावले. त्यानंतर या तिघांनी आणखी तीन साथीदारांना बोलावून घेतले व पीडित तरुणीला जबरदस्तीने दुचाकीवर बसवून खामगावजवळील एका बंद पडलेल्या डाक बंगल्यावर नेले. तेथील कट्ट्यावर सहाही जणांनी तिच्यावर सामूहिक अत्याचार केला.
पोलिसांची कारवाई
घटनेची गंभीरता लक्षात घेता तलासरी पोलिसांनी तात्काळ गुन्हा दाखल केला. पीडितेच्या फिर्यादीवरून सहा आरोपींविरुद्ध बीएनएस कलम ७०/१ अंतर्गत गुन्हा नोंदवण्यात आला. पोलिसांनी अवघ्या काही तासांत तीन आरोपींना अटक केली, तर उर्वरित तीन आरोपी अद्याप फरार आहेत. त्यांचा शोध सुरू असल्याची माहिती तलासरी पोलीस निरीक्षक अजय गरुड यांनी दिली.
पोलीस अधीक्षकांची घटनास्थळी भेट
या घटनेच्या गांभीर्याने पोलीस अधीक्षकांनी घटनास्थळी भेट देऊन पाहणी केली. तसेच, फरार आरोपींना लवकरात लवकर पकडण्याच्या सूचना पोलीस यंत्रणेला देण्यात आल्या आहेत. स्थानिक नागरिकांमध्ये या घटनेमुळे संतापाची लाट उसळली असून, दोषींना कठोर शिक्षा व्हावी, अशी मागणी होत आहे.
महिला सुरक्षेचा प्रश्न पुन्हा चर्चेत
राज्यात महिलांवरील अत्याचारांच्या वाढत्या घटनांमुळे महिला सुरक्षेचा मुद्दा पुन्हा एकदा चर्चेत आला आहे. पोलिसांनी दक्षता वाढवण्याच्या सूचना दिल्या असल्या तरी प्रत्यक्षात अशा घटनांना आळा बसत नसल्याचे चित्र आहे. या घटनेनंतर स्थानिक प्रशासनाकडून अधिक कठोर पावले उचलण्याची मागणी जोर धरू लागली आहे.
By
