नीट पेपरफुटी प्रकरणी विद्यार्थ्यांवर झालेल्या लाठीचार्जने अण्णा हजारे दुःखी. पंतप्रधानांना पत्र लिहून संवादाचे आवाहन; अहिल्यानगरमध्ये मौन आंदोलनाची घोषणा.
अण्णा हजारे यांचा विद्यार्थ्यांना पाठिंबा; नीट पेपरफुटीविरोधात मौन आंदोलनाचा निर्णय
नीट (NEET) परीक्षेतील कथित पेपरफुटी आणि त्यानंतर दिल्लीत विद्यार्थ्यांवर झालेल्या पोलीस कारवाईमुळे ज्येष्ठ समाजसेवक अण्णा हजारे यांनी गंभीर चिंता व्यक्त केली आहे. या प्रकरणी त्यांनी पंतप्रधान नरेंद्र मोदी यांना पत्र लिहून सरकारला संवादाच्या माध्यमातून प्रश्न सोडवण्याचे आवाहन केले आहे. तसेच, अहिल्यानगरमध्ये मौन आंदोलन करण्याचा निर्णयही त्यांनी जाहीर केला आहे.
दिल्लीत विद्यार्थ्यांवर पोलीस कारवाईने अण्णा हजारे दुःखी
नीट पेपरफुटी प्रकरणाच्या निष्पक्ष चौकशीसाठी आणि केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी गेल्या २५ दिवसांपासून दिल्लीतील जंतर-मंतर येथे विद्यार्थी आंदोलन करत आहेत. या आंदोलनादरम्यान पोलिसांनी विद्यार्थ्यांवर केलेल्या लाठीचार्जची अण्णा हजारे यांनी तीव्र निराशा व्यक्त केली आहे.
अण्णा हजारे म्हणाले, “लोकशाहीत दडपशाहीला स्थान नाही. विद्यार्थ्यांवरील ही कारवाई अत्यंत वेदनादायी आहे. सरकारने आंदोलकांशी संवाद साधून त्यांचे प्रश्न सोडवावेत”.
पंतप्रधानांना पत्र
अण्णा हजारे यांनी पंतप्रधान नरेंद्र मोदी यांना लिहिलेल्या पत्रात म्हटले आहे की, “लोकशाहीत संवाद हा नेहमीच चांगला मार्ग आहे. सहनशीलतेने लोकांचे ऐकणे, विश्वासाचे वातावरण निर्माण करणे आणि सकारात्मक संवादातून उपाय शोधणे ही लोकशाहीची खरी कसोटी आहे”. त्यांनी सरकारला आंदोलकांकडे “विरोधी पक्ष” म्हणून न पाहता देशाचे नागरिक म्हणून पाहण्याचे आवाहन केले आहे.
पेपरफुटीच्या पुनरावृत्तीकडे लक्ष वेधताना अण्णा हजारे म्हणाले की, २०२४ आणि २०२६ मध्ये झालेल्या पेपरफुटीचा परिणाम सुमारे २२ लाख विद्यार्थ्यांवर झाला आहे. या निराशेतून २२ विद्यार्थ्यांनी आत्महत्या केल्याच्या वृत्तांमुळे ते दुःखी झाल्याचेही त्यांनी पत्रात नमूद केले.
मंत्र्यांच्या राजीनाम्याने सरकार कमकुवत होणार नाही’
अण्णा हजारे यांनी केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीला पाठिंबा दिला आहे. ते म्हणाले, “केंद्रीय शिक्षणमंत्र्यांच्या राजीनाम्याने सरकार कमकुवत होणार नाही, उलट इतर मंत्र्यांना योग्य प्रशासनाचा संदेश जाईल”. तसेच, अनियमिततेची जबाबदारी फक्त कनिष्ठ अधिकाऱ्यांवर ढकलण्याच्या पद्धतीवर त्यांनी टीका केली.
‘नगरचे जंतर-मंतर’ म्हणून ओळखले जाणारे मौन आंदोलन
दिल्लीतील आंदोलनाला पाठिंबा म्हणून अण्णा हजारे गुरुवारी (२३ जुलै) सकाळी ११ ते दुपारी १ या वेळेत अहिल्यानगरमधील वाडिया पार्क येथील महात्मा गांधी स्मारकावर मौन आंदोलन करणार आहेत. या ठिकाणाला प्रतीकात्मक स्वरूपात ‘नगरचे जंतर-मंतर’ असे संबोधले जाणार आहे.
महात्मा गांधी यांच्या सत्याग्रह आणि अहिंसेच्या आदर्शांचा हवाला देत अण्णा हजारे म्हणाले की, “आपला देश गांधीजींच्या सत्याग्रहाच्या तत्त्वांचा आणि राज्यघटनेने स्थापित केलेल्या लोकशाही मूल्यांचा वारस आहे. मतभेद नैसर्गिक आहेत, परंतु ते संवाद, संवेदनशीलता आणि परस्पर आदरातून सोडवले पाहिजेत”.
By
