प्रियकराने प्रेयसीच्या लग्नानंतर अश्लील व्हिडिओ इंस्टाग्रामवर व्हायरल केले, पतीलाही पाठवले.

छत्रपती संभाजीनगरमधील तरुणीने पोलिसांत तक्रार देत गुन्हा दाखल केला

प्रेमापासून द्वेषापर्यंतचा प्रवास

प्रत्येकजण प्रेमात यशस्वी होत नाही, काही जन अपयश आल्यानंतर झालं गेलं सोडून देऊन आयुष्यात पुढे जातात, तर काहीजण विकृत मानसिकतेचा बळी ठरतात. असाच एक धक्कादायक प्रकार छत्रपती संभाजीनगरमध्ये उघडकीस आला आहे. प्रेयसी सोबत दोन वर्षांपूर्वी ब्रेकअप झाले. नंतर त्या तरुणीने आपल्या घरच्यांच्या आवडीने लग्न केले. मात्र तिचा अधिचा प्रियकर तिला त्रास देत राहिला. त्याने फोटो आणि व्हिडिओंचा वापर करून तिला ब्लॅकमेल केले. धमक्यां दिल्या त्याने अश्लील व्हिडिओ सोशल मीडियावर व्हायरल केले आणि तिच्या नवऱ्यालाही पाठवले. मग त्या तरुणीने वैजापूर पोलीस ठाण्यात धाव घेतली. तिने आपल्या माजी प्रियकराविरुद्ध तक्रार दाखल केली आहे. पोलिसांनी गुन्हा दाखल करून तपास सुरू केला आहे.

कोण आहे संशयित?

कपिल बालाजी गाडगीळ असे संशयित तरुणाचे नाव आहे. तो छत्रपती संभाजीनगरमधील भारतनगर, गारखेडा परिसरात राहतो. तर तक्रारदार तरुणी सध्या वैजापूर पोलीस ठाण्याच्या हद्दीतील एका गावात आपल्या पतीसोबत राहते. तिचे वडील शाळेत शिपाई म्हणून कार्यरत आहेत.

या प्रकरणाची सुरुवात कशी झाली?

तक्रारीत म्हटल्यानुसार, तरुणी पूर्वी छत्रपती संभाजीनगर शहरातील गारखेडा भागात राहत होती. तिथेच तिची कपिल सोबत ओळख झाली आणि हळूहळू दोघांमध्ये प्रेमसंबंध निर्माण झाले. दोघे एकांतात असताना कपिलने तिचे अनेक फोटो आणि व्हिडीओ काढले होते. व्हिडीओ कॉलदरम्यानही त्याने तिच्या खासगी संभाषणांची रेकॉर्डिंग केली होती, असे तिने सांगितले. दोन वर्षांपूर्वी दोघांमध्ये ब्रेकअप झाले. त्यानंतर तरुणीने कपिलशी बोलणे पूर्णपणे बंद केले. गेल्या २७ जूनला तरुणीचे वैजापूर परिसरातील एका युवकासोबत लग्न झाले. ती आता पतीसोबत सासरी राहत आहे.

२६ जूनपासून सुरू झाल्या धमक्या

तरुणीच्या लग्नाची माहिती मिळताच कपिलने तिला २६ जूनपासून धमकावण्यास सुरुवात केली. “तू माझ्याशी बोल, नाहीतर तुझे अश्लील व्हिडीओ व्हायरल करेन,” अशी धमकी तो देऊ लागला. फक्त धमक्यांपुरते मर्यादित न राहता त्याने प्रत्यक्षात तिचे अश्लील फोटो आणि व्हिडीओ आपल्या इंस्टाग्राम खात्यावर अपलोड केले.

नावाचे खोटे खाते बनवून तरुणीची बदनामी केली.

कपिलने तरुणीच्या नावानेही एक बनावट इंस्टाग्राम खाते तयार केले. या खात्यावर त्याने तिचे अश्लील फोटो आणि व्हिडीओ पोस्ट केले. याशिवाय, २८ जूनला त्याने तेच फोटो आणि व्हिडीओ तिच्या पतीच्या व्हॉट्सॲपवर पाठवून तिची जाहीर बदनामी केली.

तरुणीला जीवे मारण्याची धमकी दिली.

या सर्व प्रकारांनंतर सुधा तरुणीने कपिलला समजावण्याचा प्रयत्न केला. मात्र त्याने तिला आणखी धमकावले. “तू जर पोलिसांत तक्रार दिलीस, तर तुला आणि तुझ्या घरच्यांना जीवे मारून टाकेन,” अशी धमकी त्याने दिली. यामुळे तरुणीने शेवटी पोलिसांची मदत घेण्याचा निर्णय घेतला.

पोलिसांची कारवाई

तक्रार मिळाल्यानंतर वैजापूर पोलिसांनी कपिल विरुद्ध गुन्हा दाखल केला आहे. त्याच्यावर भारतीय दंड विधानातील विविध कलमांन्वये गुन्हा नोंदवण्यात आला आहे. पोलिसांचे पथक आरोपीचा शोध घेत आहे. अधिक तपास सुरू असून, लवकरच आरोपीला अटक केली जाईल, अशी माहिती पोलीस सूत्रांनी दिली.

सोशल मीडियाचा गैरवापर वाढला

सोशल मीडियाचा वापर वाढत असतानाच, त्याचा गैरवापरही वाढत आहे. अश्लील फोटो व्हायरल करून बदनामी करणे आणि ब्लॅकमेल करण्याच्या घटनांमध्ये वाढ झाली आहे. अशा घटनांमध्ये त्वरित पोलिसांकडे तक्रार करावी. फोटो किंवा व्हिडीओ सोशल मीडियावर व्हायरल झाल्यास सायबर सेलची मदत घ्यावी.

अश्या घटनांमध्ये महिलांनी की करावे ?

• कोणत्याही प्रकारच्या धमकीला बळी न पडता त्वरित पोलिसांशी संपर्क साधा
• अश्लील फोटो किंवा व्हिडीओच्या बाबतीत सायबर सेलकडे तक्रार करा
• पुरावे जपून ठेवा जेणेकरून कायदेशीर कारवाईत मदत होईल
• कुटुंबीय आणि मित्रांचा विश्वास ठेवा, एकट्या समस्येचा सामना करू नका

अशा प्रकरणामध्ये कायदेशीर तरतुदी काय आहेत ?

अशा प्रकारच्या घटनांमध्ये सायबर क्राइम कायद्यांतर्गत कठोर तरतुदी आहेत. अश्लील साहित्य व्हायरल करणे, खोट्या खात्यांद्वारे बदनामी करणे आणि धमकावणे या गंभीर गुन्ह्यांमध्ये मोडतात. दोषी ठरल्यास मोठ्या कारावासाची शिक्षा होऊ शकते.