बीडमध्ये विभागीय वन अधिकारी श्रीनिवास लखमावाड यांना ४५ लाख रुपयांची लाच स्वीकारताना ACB ने रंगेहात पकडले.

पालकमंत्री सुनेत्रा पवार यांच्या बैठकीनंतर ही कारवाई करण्यात आली.

पालकमंत्र्यांच्या बैठकीत सहभाग, घरी जाऊन घेतली ४५ लाखांची लाच; ACB चा मोठा कारवाईचा धडाका

बीड जिल्ह्यात भ्रष्टाचारविरोधात मोठी कारवाई करत लाचलुचपत प्रतिबंधक विभागाने (ACB) एका वरिष्ठ वन अधिकाऱ्याला ४५ लाख रुपयांची लाच घेताना रंगेहात अटक केली आहे. ही घटना विशेष धक्कादायक ठरली कारण आरोपी अधिकारी काही तासांपूर्वीच उपमुख्यमंत्री तथा जिल्ह्याच्या पालकमंत्री सुनेत्रा पवार यांच्या उपस्थितीत झालेल्या जिल्हा नियोजन समितीच्या बैठकीला उपस्थित होता.

पालकमंत्र्यांच्या बैठकीनंतरच सापळा

उपमुख्यमंत्री सुनेत्रा पवार या दोन दिवसीय बीड दौऱ्यावर होत्या. आज त्यांनी जिल्हा नियोजन समितीची बैठक घेतली, ज्यामध्ये जिल्हा विकासाच्या दृष्टीने महत्त्वाच्या सूचना केल्या. या बैठकीला उपस्थित राहिल्यानंतर विभागीय वन अधिकारी श्रीनिवास लिंगन्ना लखमावाड (४०) हे आपल्या निवासस्थानी परतले. त्यांच्या बीडमधील नागर नाका येथील कालवा रस्त्यावरील उर्जा हाईट्स या राहत्या घरी त्यांनी ४५ लाख रुपयांची लाच स्वीकारली. याच वेळी पूर्वनियोजित सापळा रचून आलेल्या ACB च्या पथकाने त्यांना रंगेहात पकडले.

का मागितली होती एवढी मोठी लाच?

मिळालेल्या माहितीनुसार, आरोपी अधिकाऱ्याने २०२५-२६ या आर्थिक वर्षातील वृक्षलागवडीची बिले मंजूर करणे, कर्मचाऱ्यांचे थकीत वेतन अदा करणे आणि निलंबनाची कारवाई मागे घेण्याच्या बदल्यात ही लाच मागितली होती. तक्रारदार रेंज फॉरेस्ट ऑफिसरने २९ जुलै रोजी छत्रपती संभाजीनगर येथील ACB कार्यालयात लेखी तक्रार नोंदवली. तक्रारीची पडताळणी केल्यानंतर ACB ने सापळा रचण्याचा निर्णय घेतला.

४० लाख रुपये होते डमी नोटा!

या कारवाईतील सर्वात आश्चर्यकारक बाब म्हणजे, लाचेच्या एकूण ४५ लाख रुपयांच्या रकमेपैकी केवळ ५ लाख रुपये खऱ्या नोटा होत्या, तर उर्वरित ४० लाख रुपयांच्या नोटा ‘मनोरंजन बँक’ (डमी) होत्या. ACB ने सापळा रचताना ५ लाख रुपयांच्या खऱ्या नोटा आणि ४० लाख रुपयांच्या डमी नोटांचे पार्सल तयार केले होते. लखमावाड यांनी हे पार्सल स्वीकारताच त्यांना अटक करण्यात आली.

प्रशासनात खळबळ

या कारवाईमुळे जिल्ह्याच्या प्रशासकीय वर्तुळात मोठी खळबळ उडाली आहे. आरोपी अधिकारी हा वर्ग-१ अधिकारी असून सामाजिक वनीकरण विभागात कार्यरत होता. छत्रपती संभाजीनगर ACB युनिटच्या पथकाने ही कारवाई केली. आरोपीविरुद्ध भ्रष्टाचार प्रतिबंधक कायद्याच्या कलम ७ अंतर्गत गुन्हा दाखल करण्यात आला असून पुढील तपास सुरू आहे.

या धडक कारवाईमुळे सरकारी यंत्रणेत भ्रष्टाचाराविरोधात मोठा संदेश गेल्याची चर्चा आहे. ACB च्या वाढत्या कारवाईमुळे इतर सरकारी अधिकाऱ्यांमध्येही खळबळ उडाली आहे.