बीड जिल्ह्यातील केज तालुक्यात अवादा एनर्जीच्या पवनचक्की प्रकल्पाचे काम अडवून ३० लाख रुपयांची खंडणी आणि दोन मुलांना नोकरीची मागणी; मागणी पूर्ण न झाल्यास जेसीबी जाळण्याची आणि अधिकाऱ्यांना जीवे मारण्याची धमकी; कंपनीतच कार्यरत असलेल्या मुलानेच आई-वडिलांना केली चिथावणी.
बीड : पवनऊर्जा क्षेत्रातील नामवंत कंपनी अवादा एनर्जीच्या प्रकल्पाचे काम अडवून तब्बल ३० लाख रुपयांच्या खंडणीची मागणी करण्यात आल्याचा धक्कादायक प्रकार बीड जिल्ह्यातील केज तालुक्यातील जिवाचीवाडी येथे समोर आला आहे. जमीन मालक पती-पत्नी आणि त्यांचा मुलगा—जो स्वतः याच कंपनीत सुरक्षारक्षक म्हणून कार्यरत आहे—अशा तिघांविरुद्ध केज पोलीस ठाण्यात खंडणी आणि जीवे मारण्याची धमकी दिल्याप्रकरणी गुन्हा दाखल करण्यात आला आहे. विशेष म्हणजे, ही धमकी पोलिसांच्या समोरच देण्यात आली होती.
केज पोलीस ठाण्याच्या माहितीनुसार, जिवाचीवाडी शिवारातील सर्वे क्रमांक ४९६, ४९७, ४९८, ४९९ आणि ५०० मध्ये अवादा एनर्जी कंपनीच्यावतीने चार पवनचक्क्या उभारण्याचे काम प्रस्तावित आहे. या जमिनीचा मोबदला संबंधित जमीन मालकांना शासकीय नियमानुसार आधीच अदा करण्यात आला आहे.
नेमकं काय घडलं?
३ नोव्हेंबर रोजी दुपारी सुमारास अवादा एनर्जीचे वरिष्ठ अधिकारी विशाल जयप्रकाश शेलार हे पोलीस संरक्षणात जेसीबी मशीनसह कामासाठी घटनास्थळी गेले होते. त्यांच्यासोबत दत्ता टिंगरे, अक्षय टेकाळे, नितीन कांबळे हे कर्मचारी आणि मजूर उपस्थित होते.
काम सुरू असतानाच जमीन मालक प्रभू (प्रभाकर) नारायण सारूक आणि त्यांची पत्नी प्रमिला प्रभू सारूक (रा. जिवाचीवाडी) यांनी तिथे येऊन बळजबरीने काम बंद पाडले. कंपनीच्या अधिकाऱ्यांनी त्यांना जमिनीचा मोबदला आधीच दिला असल्याचे सांगत काम न अडविण्याचे आवाहन केले. मात्र, संशयितांनी ३० लाख रुपयांची रोख रक्कम आणि दोन मुलांना कंपनीत कायमस्वरूपी नोकरी अशा अवाजवी मागण्या लावून धरल्या.
पोलिसांसमोरच जीवे मारण्याची धमकी
मागणी पूर्ण न केल्यास “जेसीबी मशीन जागेवरच जाळून टाकू आणि अधिकाऱ्यांना संपवून टाकू,” अशी थेट धमकी संशयितांनी उपस्थित पोलिसांसमोरच दिली. केवळ धमकी नाही, तर कंपनीच्या अधिकाऱ्यांना अर्वाच्य भाषेत शिवीगाळही करण्यात आली. या घटनेमुळे शिवारात काही काळ तणावाचे वातावरण निर्माण झाले होते.
कंपनीच्याच गार्डने दिली चिथावणी
या प्रकरणातील सर्वात धक्कादायक बाब म्हणजे संशयित दाम्पत्याचा मुलगा मच्छिंद्र प्रभाकर सारूक हा स्वतः अवादा एनर्जी कंपनीत सुरक्षारक्षक म्हणून कार्यरत आहे. तपासात असे समोर आले आहे की, मच्छिंद्रनेच आपल्या आई-वडिलांना फोन करून कंपनीचे काम बंद पाडण्यासाठी आणि जागेवर जाऊन गोंधळ घालण्यास सांगितले होते. ज्या कंपनीत तो नोकरी करतो, त्याच कंपनीचे काम रोखण्यासाठी त्याने पालकांना चिथावणी दिल्याचे समोर आल्याने पोलीस तपासात खळबळ उडाली आहे.
गुन्हा दाखल; तिघांचा शोध सुरू
अवादा एनर्जीचे वरिष्ठ अधिकारी विशाल शेलार यांच्या फिर्यादीवरून केज पोलीस ठाण्यात प्रभू नारायण सारूक, प्रमिला प्रभू सारूक आणि मच्छिंद्र प्रभाकर सारूक या तिघांविरुद्ध भारतीय न्याय संहिता (BNS) कलम १०८(२), ३५१(२), ३५२ आणि ३(५) अंतर्गत खंडणी व जीवे मारण्याची धमकी दिल्याप्रकरणी गुन्हा दाखल करण्यात आला आहे.
पोलीस निरीक्षक राहुल सूर्यतळ यांच्या मार्गदर्शनाखाली पोलीस हेडकॉन्स्टेबल उमेश आघाव पुढील तपास करत आहेत. अद्याप कोणालाही अटक करण्यात आलेली नाही; पोलीस तिघांचा शोध घेत आहेत.
यापूर्वी काय घडलं होतं?
हे प्रकरण अवादा एनर्जीशी संबंधित पहिले खंडणीचे प्रकरण नाही. यापूर्वी याच कंपनीकडे २ कोटी रुपयांच्या खंडणीची मागणी झाल्याची नोंद आहे, ज्यामध्ये वाल्मिक कराड याच्यासह अन्य आरोपींविरुद्ध गुन्हे दाखल झाले होते. या प्रकरणाशी संबंधित मस्साजोगचे सरपंच संतोष देशमुख यांची डिसेंबर २०२४ मध्ये हत्या झाली होती. देशमुख यांनी अवादा कंपनीवरील खंडणीच्या प्रयत्नांना विरोध केला होता, असे तपासातून समोर आले होते. ताज्या घटनेमुळे पवनचक्की प्रकल्पांच्या सुरक्षेचा आणि स्थानिक स्तरावरील खंडणीच्या धोक्याचा प्रश्न पुन्हा एकदा ऐरणीवर आला आहे.
By
