गोंदिया / मराठवाडा अपडेट 24 : कर्जतमधील वीजप्रकल्पासाठी होणाऱ्या वृक्षतोडीविरोधात राज्यभरातून विरोध सुरू असतानाच राज्य वन्यजीव मंडळाने आणखी एका प्रकल्पासाठी तब्बल 5 हजार 152 झाडे तोडण्यास मंजुरी दिल्याची माहिती समोर आली आहे. रायपूर ते तिरोडा दरम्यान उच्च क्षमतेची वीजवाहिनी टाकण्यासाठी ही झाडे तोडली जाणार आहेत. ही वीजवाहिनी व्याघ्र अभयारण्यांना जोडणाऱ्या भ्रमणमार्गातून जाणार असल्याने वाघांच्या संचारावर परिणाम होण्याची भीती व्यक्त होत आहे.
काय आहे प्रकल्प?
मिळालेल्या माहितीनुसार, अदानी पॉवर लिमिटेड कंपनीच्या रायपूर टीपीपी उपकेंद्रापासून तिरोडा उपकेंद्रापर्यंत 400 केव्ही वीजवाहिनी टाकण्यात येणार आहे. ही वीजवाहिनी व्याघ्र भ्रमणमार्गातून तसेच अनेक शेतकऱ्यांच्या शेतातून जाणार आहे. महाराष्ट्रातील नवेगाव-नागझिरा व्याघ्रक्षेत्रांना हा भ्रमणमार्ग जोडत असल्याने या भागात वाघांचा संचार असतो.
136 हेक्टरमधील 5,152 झाडे तोडणार?
या मार्गातील 136 हेक्टर क्षेत्रावरील 5 हजार 152 झाडे प्रकल्पासाठी तोडावी लागणार आहेत. त्यासंदर्भातील प्रस्ताव राज्य वन्यजीव मंडळाकडे आला होता. मंडळाने या वृक्षतोडीला मंजुरी दिली असून अंतिम मंजुरीसाठी तो केंद्रीय वन्यजीव मंडळाकडे पाठवण्यात आला असल्याची माहिती आहे.
व्याघ्र भ्रमणमार्गावर परिणामाची भीती
व्याघ्र अभयारण्यांना जोडणाऱ्या भ्रमणमार्गात ही झाडे असल्याने ती तोडल्यास वाघांच्या संचारावरही परिणाम होण्याची भीती वन्यजीवप्रेमींनी व्यक्त केली आहे. पर्यावरणाचा मोठा ऱ्हास होईल, असेही मत व्यक्त होत आहे.
शेतकऱ्यांचा आक्षेप
वीजवाहिनी अनेक शेतकऱ्यांच्या शेतातून जाणार असल्याने शेतकऱ्यांनीही याला विरोध केला आहे. वीजवाहिनी शेतातून गेल्यानंतर जमिनीचे दर कमी होण्याची भीती शेतकऱ्यांनी व्यक्त केली आहे.
तज्ज्ञ काय म्हणतात?
या संदर्भात मानद वन्यजीव संरक्षक सावन बहेकार यांच्याशी बातचीत करण्यात आली असता, या प्रकल्पासाठी वाघाच्या भ्रमण क्षेत्रातील झाडे तोडली गेल्यास पर्यावरणाचा मोठा ऱ्हास होईल आणि व्याघ्र भ्रमण मार्गातील झाडं तोडणे चुकीचं असल्याचं त्यांनी सांगितलं.
अदानी प्रकल्पाच्या अधिकाऱ्यांची प्रतिक्रिया
तिरोडा येथील अदानी प्रकल्पाच्या काही अधिकाऱ्यांशी बोलण्याचा प्रयत्न करण्यात आला असता, अशा पद्धतीची लाईन आणली जाणार असल्याचे त्यांनी सांगितले. मात्र या संदर्भात अधिक माहिती आमचे जनसंपर्क कार्यालयच देऊ शकेल, अशी माहिती त्यांनी दिली.
पुढील प्रक्रिया
राज्य वन्यजीव मंडळाने वृक्षतोडीला मंजुरी दिली असली, तरी अंतिम मंजुरीसाठी प्रस्ताव केंद्रीय वन्यजीव मंडळाकडे पाठवण्यात आला आहे. त्यामुळे या प्रकल्पावरील विरोध आणि पुढील निर्णयाकडे वन्यजीवप्रेमी तसेच शेतकरी यांचे लक्ष लागले आहे.
By
