१७ ऑक्टोबरपासून दक्षिण महाराष्ट्र, मध्य महाराष्ट्र आणि कोकणात अवकाळी पावसाचा अंदाज; मुंबईत २० ऑक्टोबरपर्यंत सरींची शक्यता, शेतकऱ्यांना पिकांची काळजी घेण्याचे आवाहन
ऑक्टोबरच्या उन्हाने हैराण झालेल्या महाराष्ट्रात आता हवामानात मोठा बदल होणार आहे. भारतीय हवामान विभागाने (IMD) १७ ऑक्टोबरपासून राज्यात अवकाळी पावसाचा अंदाज वर्तवला असून, राज्यातील १५ जिल्ह्यांना येलो अलर्ट जारी केला आहे. दक्षिण महाराष्ट्र, मध्य महाराष्ट्र आणि कोकणात पावसाची शक्यता असून मराठवाड्यातील नांदेड, लातूर, धाराशिव, बीड, परभणी आणि हिंगोली या भागांतही विजांच्या कडकडाटासह वादळी वाऱ्यासह पावसाचा इशारा देण्यात आला आहे.
नेमकं काय घडणार? हवामान विभागाचा अंदाज
उत्तर-पूर्व मान्सून येत्या दोन-तीन दिवसांत तामिळनाडूमध्ये दाखल होत असून, १४ ते १७ ऑक्टोबरदरम्यान उत्तर भारतात एक वेस्टर्न डिस्टर्बन्स सक्रिय होत आहे. या पार्श्वभूमीवर महाराष्ट्रातील अनेक भागांत पावसासाठी वातावरण तयार होत असून १७ ऑक्टोबरपासून राज्यात अवकाळी पावसाचा अंदाज हवामान विभागाने वर्तवला आहे.
कोणत्या जिल्ह्यांना इशारा?
हवामान विभागानुसार, छत्रपती संभाजीनगर, बीड, जालना, लातूर, धाराशिव, नाशिक, धुळे, जळगाव, अहमदनगर, पुणे, सातारा, रायगड आणि रत्नागिरी या जिल्ह्यांना येलो अलर्ट जारी करण्यात आला आहे. तसेच कोकण आणि दक्षिण महाराष्ट्रातील जिल्ह्यांत सोसाट्याच्या वाऱ्यासह पावसाची शक्यता आहे. रायगड, रत्नागिरी, सिंधुदुर्ग, पुणे (घाट परिसर), सातारा, कोल्हापूर, सांगली, सोलापूर, धाराशिव, लातूर आणि नांदेड या जिल्ह्यांमध्ये विजांच्या कडकडाटासह आणि ३० ते ४० किमी प्रतितास वेगाने वाहणाऱ्या सोसाट्याच्या वाऱ्यासह पावसाचा इशारा आहे.
मराठवाड्यावर काय परिणाम?
मराठवाड्यात १६ ऑक्टोबरपासून मेघगर्जना आणि विजांच्या कडकडाटासह हवामानातील बदलाची शक्यता आहे. नांदेड, बीड आणि लातूरच्या काही भागांत हलक्या सरींची शक्यता असून नागरिकांना काही प्रमाणात दिलासा मिळण्याची शक्यता आहे. हवामान तज्ज्ञ पंजाबराव डख यांच्या अंदाजानुसार, दसरा झाल्यानंतर २० ते २५ ऑक्टोबर दरम्यान परतीचा पाऊस पडणार असून या पावसाने शेतकऱ्यांची रब्बीची पेरणी होणार आहे. मात्र हा पाऊस सर्वदूर पडणार नाही, काही ठिकाणी रिमझिम तर कुठे जोरात पडेल, असा अंदाज त्यांनी वर्तवला आहे.
मुंबईचं काय? उकाड्यानंतर पावसाची शक्यता
सध्या मुंबई, ठाणे आणि पालघर परिसरात उकाडा आणि तीव्र उष्णता जाणवत आहे. मुंबईत ११ वर्षांतील, तर रत्नागिरीत १४३ वर्षांतील उष्ण तापमानाचा विक्रम नोंदवला गेला आहे. हवामानातील बदलानंतर २० ऑक्टोबरच्या सुमारास मुंबईतही पावसाची शक्यता वर्तवण्यात आली आहे. १८ ते २० ऑक्टोबर दरम्यान मुंबई महानगर प्रदेशात तुरळक मध्यम पाऊस आणि वादळी वाऱ्याची शक्यता असून तापमान २९ ते ३१ अंश सेल्सिअसदरम्यान राहण्याचा अंदाज आहे.
शेतकऱ्यांसाठी महत्त्वाची सूचना
ऐन दिवाळीत पावसाचा अंदाज असल्याने शेतकऱ्यांनी पिकांचे नुकसान टाळण्यासाठी आणि उत्पादन सुरक्षित ठेवण्यासाठी वेळेवर पाणी निचरा, योग्य फवारणी व आळवणी करण्याची काळजी घ्यावी, असा सल्ला कृषी तज्ज्ञांनी दिला आहे. पश्चिम महाराष्ट्रातील शेतकऱ्यांनी सोयाबीन आणि कापूस या पिकांची काढणी पुढे ढकलण्याचा सल्ला देण्यात आला आहे, जेणेकरून अवकाळी पावसामुळे नुकसान टळू शकेल. तसेच विजांच्या कडकडाटाच्या वेळी नागरिकांनी घराबाहेर न पडण्याचे आणि मोकळ्या जागेत न थांबण्याचे आवाहन प्रशासनाकडून करण्यात आले आहे.
पुढे काय?
हवामान विभागानुसार, १८ ऑक्टोबरपर्यंत देशातून मान्सून पूर्णपणे माघारी जाण्याची शक्यता आहे. मात्र त्यापूर्वी राज्यात अवकाळी पावसाचा हा दणका बसणार असल्याने दिवाळीच्या तयारीवर आणि शेती कामांवर परिणाम होण्याची शक्यता आहे. नागरिकांनी हवामान विभागाच्या अद्ययावत अंदाजांची माहिती घ्यावी आणि आवश्यक ती खबरदारी घ्यावी, असे आवाहन प्रशासनाने केले आहे.
By
