छत्रपती संभाजीनगरात राजकीय तणाव वाढला. भाजपने काँग्रेस भवनावर मोर्चा काढत राहुल गांधीवर आरोप केले. काँग्रेस कार्यकर्त्यांनी धर्मेंद्र प्रधान यांच्या राजीनाम्याची मागणी केली. पोलिसांनी परिस्थिती नियंत्रणात आणली
छत्रपती संभाजीनगरात हायव्होल्टेज राजकीय ड्रामा; भाजपचा काँग्रेस भवनावर मोर्चा
राजधानी दिल्लीतील राजकीय घडामोडींचे पडसाद आता छत्रपती संभाजीनगरात उमटले आहेत. बुधवारी (२२ जुलै) शहराच्या मध्यवर्ती शहागंज भागातील काँग्रेस भवनासमोर भाजप आणि काँग्रेस कार्यकर्ते आमने-सामने आल्याने परिसरात तणाव निर्माण झाला. भारतीय जनता पार्टीने काँग्रेसविरोधात मोर्चा काढत विरोधी पक्षनेते राहुल गांधी यांच्यावर देशात अराजकता पसरवण्याचा आरोप केला, तर काँग्रेस कार्यकर्त्यांनी केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत जोरदार प्रत्युत्तर दिले. पोलिसांनी वेळीच हस्तक्षेप करून परिस्थिती नियंत्रणात आणली.
दिल्लीतील आंदोलनाचा निषेध; भाजपची काँग्रेस भवनावर धडक
दिल्लीत पंतप्रधान नरेंद्र मोदी यांच्या अधिकृत निवासाबाहेर काँग्रेसतर्फे करण्यात आलेल्या आंदोलनाचा निषेध म्हणून भाजपने छत्रपती संभाजीनगरात मोर्चा काढला. या मोर्चात राज्याचे मंत्री अतुल सावे, माजी केंद्रीय राज्यमंत्री डॉ. भागवत कराड, महापौर समीर राजूरकर, माजी आमदार संजय केणेकर, भाजप शहराध्यक्ष किशोर शितोळे, स्थायी समिती अध्यक्ष अनिल मकरिये, भाजप महिला आघाडी नेत्या उज्ज्वला दहिफळे यांसह अनेक पदाधिकारी व कार्यकर्ते सहभागी झाले होते. मोर्चादरम्यान भाजप कार्यकर्त्यांनी राहुल गांधी आणि काँग्रेसविरोधात जोरदार घोषणाबाजी केली.
काँग्रेसचे प्रत्युत्तर; NEET प्रकरणी आंदोलन
दुसरीकडे, काँग्रेस नेते व कार्यकर्तेही काँग्रेस भवनाबाहेर जमा झाले होते. त्यांनी भाजप आणि केंद्र सरकारविरोधात नारेबाजी केली. काँग्रेस कार्यकर्त्यांनी NEET परीक्षेतील कथित पेपर लीक प्रकरणी निषेध व्यक्त केला तसेच विद्यार्थ्यांवर झालेल्या कथित लाठीचार्जचा मुद्दा उपस्थित केला. त्यांनी केंद्रीय शिक्षणमंत्री धर्मेंद्र प्रधान यांच्या राजीनाम्याची जोरदार मागणी केली. छत्रपती संभाजीनगरात काँग्रेस कार्यकर्त्यांनी ‘रास्ता रोको’ आंदोलनही केले, ज्यामुळे वाहतुकीला अडथळा निर्माण झाला. पोलिसांनी सुमारे १५ ते १६ कार्यकर्त्यांना ताब्यात घेतले.
दोन्ही पक्षांचे कार्यकर्ते आमने-सामने; तणावाचे क्षण
भाजपचा मोर्चा काँग्रेस भवनाजवळ पोहोचताच दोन्ही पक्षांचे कार्यकर्ते समोरासमोर आले. दोन्ही बाजूंनी जोरदार घोषणाबाजी सुरू झाल्याने परिसरात प्रचंड तणाव निर्माण झाला. काही काळ परिस्थिती हाताबाहेर जाण्याची शक्यता निर्माण झाली होती. मात्र, पोलिसांनी काँग्रेस भवनाला वेढा घालत मोठा फौजफाटा तैनात केला होता. पोलिसांच्या वेळीवर हस्तक्षेपामुळे कोणतीही अप्रिय घटना घडली नाही आणि कायदा व सुव्यवस्था राखली गेली.
शहरातील राजकीय वातावरण तापले
या राजकीय घडामोडींमुळे छत्रपती संभाजीनगरातील वातावरण तापले आहे. दोन्ही प्रमुख पक्षांनी आपापली भूमिका स्पष्ट केली आहे. भाजपने राहुल गांधी यांच्या वक्तव्यांवर आक्षेप घेतला आहे, तर काँग्रेसने शिक्षण व्यवस्थेतील कथित अनियमितता आणि विद्यार्थ्यांच्या हिताचा मुद्दा उपस्थित केला आहे. पोलिसांनी परिसरात कडेकोट बंदोबस्त ठेवला असून, शहरातील राजकीय घडामोडींवर सर्वांचे लक्ष लागले आहे.
By
